Nangilatang dagiti sumagmamano nga opisial ti gobierno iti gatad a ₱1.3 milion a gunggona para iti asinuman a makaipaay iti impormasion a mangiturong iti pannaka bigbig ken pannaka aresto dagiti suspek iti pammapatay ti broadcaster a ni Adrian Loterte idiay Daraga, Albay idi Oktubre 12.
Maipalagip a pinaltogan ni Loterte ti dua a lallaki bayat ti kaaddana iti panaderya iti Barangay San Roque.
Isu ket anchor ti maysa nga online program ken freelance broadcaster.
Nangbukel dagiti pulis ti Bicol iti Special Investigation Task Group tapno maki koordinar kadagiti imbestigasion, pakairamanan ti forensic examination ken cybercrime investigation.
Repasoen pay dagiti otoridad ti dashcam ken cellphone footage ti biktima tapno maammuan no adda dagiti pangta wenno mensahe a mainaig iti krimen.
Ti ₱1.3 milion a gunggona ket naggapu ken ni Presidential Legislative Liaison Office Secretary Joey Salceda, Albay Gobernador Noel Rosal, Ako Bicol Representative Alfredo Garbin Jr. ken Legazpi City Mayor Hisham Ismail.
