Insagana ti National Bureau of Investigation (NBI) ti maysa a grupo a mapan idiay Laos tapno makikoordinar kadagiti lokal nga otoridad ken mangurnong iti impormasion maipapan iti dakkel a pannakasamsam ti shabu, ngem ur-urayenda pay laeng ti pammalubos manipud iti gobierno ti Laos.
Segun kenni NBI Director Melvin Matibag, makikoordinar ti ahensia iti gobierno ti Laos ken iti Department of Foreign Affairs (DFA) tapno maisayangkat ti naituding a mision.
Inlawlawag ni Matibag a ti panggep ti NBI ket saan a ti panangtiliw ti suspek idiay Laos, no saan ketdi tapno maammuan no siasino ti nangyurnos ken nangkoordinar iti pannakaipatulod ti iligal a droga ken no adda dagiti Pilipino a nairaman iti daytoy.
Plano pay ti NBI nga interbiuen ti natiliw nga indibidual ken dagiti otoridad ti Laos a nangisayangkat iti pannakaaresto tapno makagun-od iti impormasion ken maikeddeng ti posible a koneksion ti operasion iti Pilipinas.
