Manarimaan ti pannakaisayangkat ti Division Schools Press Conference ita a tawen iti Ilocos Sur National High School, Vigan City a nakipasetan dagiti 21 a pampubliko ken pribado a pagadalan iti siudad.
Gagem ti aktibidad a maikkan gundaway dagiti student journalist a maipakita ti laingna iti nadumaduma a benneg iti journalism ken maisagana dagiti makisali iti sumarsaruno a tukad ti kompetision.
Iti pannaki-uman ti Bombo Radyo Vigan ken ni Principal IV Editha Bagcal, maisaysayangkat ti kompetision iti uneg ti tallo a Sabado, manipud iti Oktubre 17 agingga Oktubre 31.
Inlawlawag ni Bagcal a napili ti aldaw ti Sabado para kadagiti aktibidad tapno saan a maistorbo ti regular a klase dagiti agad-adal ken mapagtalinaed ti instructional block kadagiti aldaw ti serrek.
Impasiguradona pay a siento porsiento ti impaay ti ISNHS a suporta kadagiti estudiante ti nasao a pagadalan a makisalip.
Kabayatanna, ti Regional Schools Press Conference ket maangayto met idiay Pangasinan inton sumaruno a tawen.
