Paingeten ti Philippine Coast Guard (PCG) ti safety and security operations iti intero a pagilian babaen ti manamnama a panagbiahe ti 1.5 agingga iti 2 million a pasahero ita nga Undas 2026.
Imbilin ni PCG Spokesperson Commodore Noemie Cayabyab kadagiti amin a 17 a Coast Guard Districts nga iyemplementar ti Oplan Biyaheng Ayos: Undas 2026 manipud Oktubre 29 agingga Nobiembre 3.
Karaman kadagiti addang ti naan-anay a panangsukimat kadagiti barko tapno malapdan ti sobra a karga, panagisayangkat kadagiti maritime patrol, ken panangisagana kadagiti response group kasta payen dagiti medikal a grupo para kadagiti posible nga emergency.
Makitinnulong met ti PCG iti Department of Transportation para iti Malasakit Help Desk a tumulong kadagiti pasahero a makapadas iti parikut bayat ti panagbiahe da.
Gagem daytoy nga addang ket tapno masigurado ti natalged a panagbiahe dagiti pasahero ken maragpat ti zero-casualty observance iti umadani nga Undas.
~Bombo Kleo
