Nakemmeg ti maysa a mannalon gapu ti panagprobokar na idiay Barangay Cabarambanan, Sinait, Ilocos Sur.
Ti suspek ket agtawen iti uppat a pulo ket siam, residente ti nadakamat a barangay.
Iti pannakiuman ti Bombo Radyo Vigan ken ni PMAJ Bryan Romeo Lopez ti Sinait Municipal Police Station, pinasingkedanna a nagresponde dagiti kameng ti Sinait Municipal Police Station iti tawag manipud ti complainant maipapan iti panagprobokar ti suspek iti nadakamat a barangay.
Nadanonan dagiti otoridad ti suspek nga aglaaw-laaw ken agobor ti balay no sadino pinadas dagiti barangay officials ken dadduma pay a tattao nga adda iti lugar a pagtalnaen ti suspek ngem saan latta daytoy a nagsardeng.
Gapu dayta, inasitgan dagiti kameng ti kapulisan a nagresponde ti suspek ken kinasaritada isuna ngem saan latta nga agtalna ken naaramid na pay a kinugtaran dagiti pulis.
Gapu dayta, kinemmeg dagiti otoridad ti suspek ket impakaammo da ti naglabsinganna.
Dimmalan ti suspek iti medical examination ket nammuan a nakainom ti arak ti suspek idi mapasamak ti insidente.
