Naikkat iti puwesto ti pulis a miembro ti Philippine National Police-Aviation Security Group a maipagarup a karaman iti natiliw a shipment ti 521 a kilos ti maipagarup nga ilegal a droga a nasalamaan idiay Laos a mapan kuma iti Pilipinas.
Pinasingkedan ni PNP Chief Jose Melencio Nartatez Jr., na-relieve iti puwesto ni Pol. Officer Aileen Manalo Mendoza ken adda iti restrictive custody ti Aviation Security Group.
Ni Mendoza ti maipagarup a nagsimpa iti flight ti eroplano, idinto a ti maipagarup a financier a ni alyas ‘Sultan’ ket saan pay a nakaruar iti pagilian.
Segun ken ni Nartatez, adda saan a nasursurok ngem sangapulo ket tallo ti persons of interest iti natiliw nga illegal a droga idiay Laos.
Inlawlawag pay ti opisial nga awan pay ti kaso a naipila kontra kadagiti person with interest, kalaksidan iti dati a piloto a naikkat iti trabaho.
