Nangiruar ti Bureau of Internal Revenue iti baro a pagannurotan tapno masigurado a mabingay a patas kadagiti drugstore, supermarket, manufacturer, distributor ken wholesaler ti gastos iti panangted ti diskwento kadagiti senior citizen.
Iti salinong ti Revenue Regulations No. 007-2026, lawlawagan ti mekanismo ti pananggudwa iti financial burden a 20 percent discount kadagiti agas ken dadduma pay a kangrunaan a magatang a maited kadagiti senior citizen.
Segun iti BIR, idi ket masansan a mapmapan kadagiti retailer ti dakkel a paset ti gastos iti diskwento, isu a masapul nga adda nalawag a katulagan iti nagbaetan dagiti kasali iti supply chain.
Nakailanad pay iti pagannurotan a nasken nga idokumento ti nasao a katulagan ken mangipasa iti kopya iti Department of Health (DOH).
