Nagkiddaw dagiti grupo ti hog raisers ken producers iti nangatngato a taripa ken temporaryo a pannakaisardeng ti panagangkat iti karne gapu iti mapapati a pannakalugida.
Iti maysa nga joint manifesto ti alyansa dagiti lokal nga agtartaraken iti baboy, nadakamat a bimmaba iti 90 pesos agingga 120 ti per kilo ti live weight farm gate price ken agtultuloy ti panangpangato ti presyo ti taraon isu a malugi dagiti agtartaraken iti baboy iti agingga 9,000 pesos iti tunggal taraken.
Gapu dayta, kiniddaw ti grupo a maisubli met laeng ti import tariff a 40 porsiyento para ti out-quota ken 30 porsiyento para iti in-quota kagiddan ti pannakaipatungpal ti temporary import ban, freeze order iti pannakairuar ti frozen imported pork manipod cold storage, ken 100 percent quarantine inspection kadagiti pantalan.
Kabayatanna, nangiruar ni Senator Francis Pangilinan ti Senate Resolution 726 tapno imbestigaran ti krisis iti sector ti livestock poultry ta mapatta-patta nga umabot iti 250 million pesos ti lugi dagiti lokal a hog raiser gapu iti nababa a farmgate price kumpara iti production cost nga 180 pesos agingga 190 kada kilo.
