Im-imbestigaran dagiti otoridad ti saan nga umiso a pannakaidulin dagiti breakbulk cargo, pakairamanan dagiti lithium battery ken sabali pay a nalaka a mauram kas posible a rason ti pannakauram ti MV June Aster a nakatayan ti 77 a tattao idiay Coron, Palawan.
Natakuatan dagiti imbestigador dagiti lithium battery ken rechargeable battery a mabalin a nag-react iti naapgad a danum a nakaigapuan ti uram iti cargo hold.
Nasarakan met iti maysa nga electrical vehicle iti abay ti paint thinner ken sabali pay a kemikal ngem segun iti MARINA, kasapulan pay laeng ti forensic examination tapno maamuan no mainaig daytoy iti panagraira ti uram.
Agtultuloy ti imbestigasion ti Philippine Coast Guard (PCG) bayat ti panagbirokda kadagiti walo a mapukpukaw a pasahero ken panagsagana iti posible a criminal case kontra iti kapitan ti barko.
