Siam a pulo ket uppat a surfer manipud iti nadumaduma a paset ti pagilian ti simmali iti National Surfing Championships 2024 idiay Barangay Sabang, Cabugao.
Iti pannaki-uman ti Bombo Radyo Vigan ken ni Gabs Batallones, Media Manager, napilida ti Barangay Sabang gapu iti napintas a dalluyon ken ti suporta a naawatda kadagiti local surfer.
Nakadepende iti kasasaad ti dalluyon ti kabaybayan ti panangisayangkatda kadagiti nadumaduma a kategorya.
Innayonna pay a napilida ti December 5-10 a petsa ti pannakaisayangkat ti event gapu ta nabasada ti forecast ti panawen a napintasto ti dalluyon kadagitoy nga aldaw.
Dagiti nakipaset ket dagiti pro surfer manipud Mindanao, Siargao, Bicol, Samar, Zambales, La Union, Aurora ken dadduma pay a paset ti pagilian.
Allukoyenna dagiti tattao a mapan agbuya ken imatangan iti laing dagiti participants nga ag-surfing.
