Umaboten iti 900,000 nga indibidual ti nangisayangkat iti pre-emptive evacuation iti intero a pagilian gapu iti bagyo Uwan, segun iti Office of the Civil Defense.
Segun ken ni OCD Assistant Secretary Bernardo Rafaelito Alejandro IV, umaboten iti 270,682 a pamilia wenno 916,863 nga indibidual ti naibakwit iti National Capital Region, Cordillera Administrative Region, ken iti Region 1, 2, 3, 4-A, 4-B, 5, 6, 7, ken 8.
Kaaduan a nagbakwit ket manipud iti Region 5 nga adda 192,765 a pamilia wenno 660,721 nga indibidual.
Sarunwen daytoy ti Region 8 nga adda 32,020 a pamilia wenno 112,760 nga indibidual, ken Region 4 nga adda 24,209 a pamilia wenno 74,388 nga indibidual.
Umabot met iti 1,098 dagiti nagbakwit iti distrito 1 ken 4 iti Quezon City, maibasar iti listaan ti city government.
