VIGAN CITY- Natay iti maysa a lakay nga agtawen 85 gapu iti mapapati a panangbugbog kenkuana iti anak na idiay Brgy. Purag, Sinait.
Binigbig ni PCInsp. Reynaldo Mendoza, hepe ti PNP-Sinait, ti biktima a ni Elpidio Yadao, agtawen iti walo pulo ket lima, balo ken residente iti nasao a lugar idinto a ti suspek ti anak na a ni Nestor Yadao, 50, maysa a security guard.
Segun iti imbestigasyon, nasangpetan iti nakainom a suspek iti ama na a nakaidda iti terrace ti pagtaengan da ket kalpasan iti sumagmamano a minutos, nangngeg dagiti karruba ti biktima iti panagpaarayat na.
Nagresponde nga insigida dagitikameng ti PNP Sinait iti nakapasamakan iti insidente ket nakita da ti biktima a dara-dara.
Mapapati a pinak-ol pay ti suspek ti ulo iti ama na kas maibasar kadagiti tallo a bato a nakita iti nakapasamakan iti krimen.
Intaray da idiay Corpuz Clinic and Hospital ngem naideklerar a dead on arrival idinto a ti suspek ket nakakustodiyan iti istasyon dagiti pulis.
Mapapati a panagibales wennu panagrebelde iti rason iti nasao a pasamak.
