VIGAN CITY— Sipsiputan ti Ilocos Sur Provincial Office (ISPPO) dagiti walo a pulis nga immunan a nairekomenda a maipatulod idiay Basilan ngem saan a natuloy.
Segun kenni PS/Supt. Rey De Peralta, provincial director ti ISPPO, saan pay laeng a naipatulod dagiti pulis idiay Basilan gapu ta madama pay laeng iti imbestigasyon kadagiti isyu a nakairamanan da.
Inbaga ni De Peralta a suruten da iti due process para kadagiti pulis tapnu saan a malabsing dagiti karbengan da.
Inpalagip iti nasao nga opisyal kadagiti pada na a pulis a respetaren da iti suot da nga uniporme ken sinapataan da nga obligasyon babaen iti panangaramid kadagiti napintas a banag kas kameng iti linteg.
Maipalagip a naipatuloden idiay Basilan dagiti sumagmamano a pulis kas paset iti internal cleansing ti PNP.
