VIGAN CITY- Manarimaan pay laeng iti imbestigasyon ti kameng ti Candon City police station iti pannakalimlimo dagiti dua a cashier iti maysa a paggasolinaan idiay San Agustin, Candon City.
Segun ken ni Police Lt. Col. Jugith Del Prado, hepe ti Candon City PNP, kitaen danto a naimbag ti CCTV footage ti paggasolinaan bareng nu naala ti camera ken nu nalawag a makita ti rupa ti suspek a nanglimlimo kadagiti biktima a da Glaidel Ellorin Daniel nga agtawen iti dua pulo ket dua, balasang ken agnaed idiay Balingaoan, Candon City kenni Devorah Rambuyan Gabuat nga agtawen iti dua pulo ket uppat, balasang ken agnaed idiay Sabuanan, Sta. Lucia.
Napasamak iti pannakalimlimo dagiti biktima idi alas dose kwarenta iti malem idi March 5 idi adda ti lalaki a mapatta-patta nga agtayag iti 5’2” agingga 5’3”, kalbo, kalalaingan na iti pudaw na, nakabado ti light blue polo shirt ken gray maong pants a nakalugan ti Honda sedan a ti plaka na ket “for registration” a gimmatang iti gasoline oil a 40 motor oil ket nagbayad iti sangaribo a pisos, sinuplyan ni Glaidel iti PHP 850.
Nagsubli ti suspek ket inbaga na a Castrol Oil iti birbiruken na isu nga insubli na ti ginatang na ket innala na ti sangaribo a pisos nga inbayad na ngem nagsubli manen ta inbaga na a sangagasut a pisos laeng ti inyawat kenkuana ni Glaidel isu a nangted manen ti balasang iti sangaribo a pisos ken ti suspek ket idi ala una ti malem iti isu met laeng nga aldaw, naduktalanen dagiti biktima nga agkurang ti sangaribo a pisos ti naglakoan da ket idi kinita da ti CCTV, nakumpirmaran a ti immuna nga inted ni Glaidel ket sangaribo a pisos, saan a sangagasut.
