VIGAN CITY- Inalerto ti Ilocos Sur Police Provincial Office (ISPPO) ti Disaster Incident Management Task Group (DIMTG) kas paset iti panagsagsagana iti iduduprak ti Bagyo Rosita.
Segun ti report a naala ti Bombo Radyo Vigan ken ni Police Community Relations Officer Chief Inspector Winnie De Vera, binilin ni Senior Superintendent Clint Bayacsan, provincial director ti ISPPO, dagiti miyembro ti nasao a task group nga agsagana da iti panagduprak ti bagyo tapnu insigida da a makaresponde kadagiti lugar a posible a nakaro a maapektaran, nangruna dagiti adda ti low lying area.
Katulungan ti ISPPO iti nasao a task group ti Provincial Disaster Risk Reduction and Management Office, Provincial Social Welfare and Development Office, ken dagiti amin a municipal ken city police station.
Malaksid iti dayta, immunan a pinagsagana ni Governor Ryan Singson ti PDRRMO para ti posible a pre-emptive ken force evacuation tapnu maliklikan ti aniyaman a casualty ken ti PSWDO ti mangted ti insigida a tulong wennu relief goods kadagiti tattao nga agbakwit ken temporaryo nga agtalinaed kadagiti evacuation area.
