VIGAN CITY – Impannakkel ni Department of the Interior and Local Government Usec. Martin Diño a kadagiti 42, 045 a barangay iti intero a pagilian ket uppat a pulo ket dua laeng ti kinasoan ti Criminal Investigation and Detection Group (CIDG) a naglabsing kadagiti pagannurotan tatta a naisakup iti community quarantine ti pagilian.
Iti pannaki-uman ti Bombo Radyo Vigan kenni Diño, kadagiti 140 a barangay nga impatulodanna ti show cause order ket lima laeng ti saan a simmungbat a ti kayatna a sawen ket aklunenda dagiti nagkuranganda.
Kabayatanna, inlawlawag ni Diño nga awan ti basul ti Department of Social Welfare and Development ken barangay captain no maipanggep iti Social Amelioration fund ta saanda nga iggem ti pondo agsipud ta nakaipaima iti City Treasurer’s Office.
Binilin pay ti opisial dagiti local government unit a mangipasada iti listaan dagiti saan pay a naikkan iti tulong pinansial babaen iti SAP a rumbeng a makaawat ta isuda iti sumaruno a maikkan.
Malaksid iti dayta, patienna a ti tunggal barangay ti makabael a mangrisut no maipanggep kadagiti nasao a bambanag ket no adda man parikut, nawayada nga agpatulong iti nasao nga ahensia.
