Nakemmeg dagiti uppat a panagsusugalda idiay Barangay Patpata 2nd, Candon City, Ilocos Sur.
Dagiti suspek ket dua a lalaki nga agtawen iti tallopulo ket maysa, ken agtawen iti limapulo ket innem, kasta pay a dua a babbai nga agtawen iti uppat a pulo ket innem, ken agtawen iti duapulo ket walo nga agpapada nga awanan iti trabaho ken agpapada nga agnaed iti nasao a lugar.
Iti pannaki-uman ti Bombo Radyo Vigan ken ni PLt. Jovelyn Antalan iti Candon City Police Station, nakaawatda iti pakaammo nga adda agsusugal iti nasao a lugar isu a nagresponde dagiti pannakabagi ti linteg ket naaktoan dagiti uppat a suspek iti panagay-ayamda iti pusoy dos isu a nakemmegda.
Segun ken ni Antalan, nabayag nga adda maidandanon kadakuada maipanggep iti panagsusugal dagiti suspek ngem saanda a maranranaan gapu iti agbaliw-baliw nga oras iti panagay-ayamda.
Naala kadakuada iti maysa a set iti baraha ken pusta nga aggatad iti P715.25.
Iti agdama, nakakustodiya iti Candon City Police Station dagiti suspek ket maisagsaganan ti kaso a sangwenda gapu iti panaglabsing iti Presidential Decree 1602.
