VIGAN CITY- Natay da Andrei Bongolan Bañez, agtawen iti pito kenni Jessie Bribon, agtawen iti sangapulo ket tallo, agpada a taga-Pantay Fatima, Vigan City gapu ti pannakalmes da iti puttot a masarakan iti nagbaetan ti Ayusan Norte ken Pantay Fatima.
Maibasar iti report, napan nagala ti bisokol ken uggot iti balangeg dagiti biktima, kadua da dagiti tallo pay a menor de edad ket idi nakadanun da iti naadalem a paset iti kadanuman, isun iti nakalmesan dagiti biktima.
Nairaman met a limmabas iti lugar da Jeffrey Quindipan Quiacusan kenni Anthony Robinacion Rebolete, agpada nga empleyado iti maysa a grocery store, nga isu iti nagpaarayatan iti maysa kadagiti kakadua dagiti dua.
Timmapog iti kadanuman ni Anthony ngem gapu ta naadalem ken nalibeg iti danum, narigatan a nangsapul kadagiti biktima agingga a naarikap na ida iti nakailum-luman da a paset iti kadanuman.
Naitaray idiay St. James Hospital dagiti biktima ngem naideklerar a dead on arrival babaen iti attending physician. 
