Nakemmeg ti maysa a Top 3 Most Wanted Person iti Regional Level babaen iti warrant of arrest idiay Barangay Danicop, Virac, Catanduanes.
Nabigbig ti akusado a ni Jojo Gazmen Magdaraog, agtawen iti sangapulo ket siam, taga-Barangay Pinipin, Sta. Cruz, Ilocos Sur, sumangsango iti dua a bilang ti kaso a Rape with Sexual Assault ken dua a bilang ti Statutory Rape.
Iti pannaki-uman ti Bombo Radyo Vigan ken ni Police Chief Master Sergeant Israel Albay manipud iti Sta. Cruz Police Station, nabayagen a napilaan iti kaso ti akusado ngem gapu iti panaglemlemmengna ket nabayagan sakbay a nakemmeg ta saanen pulos a nakita pay iti ili ti Sta. Cruz.
Innayonna a ‘cooperative’ met ti akusado idi kemmegen dagiti pannakabagi ti linteg.
Ti warrant of arrest-na ket naiparuar babaen iti Presiding Judge ti Family Court First Judicial Region, Branch 8, Candon City.
Naipan ti akusado iti Sta. Cruz Police Station para iti pannakaidalanna iti husto a proseso.
