VIGAN CITY – Sangapulo ket walo a kandidata ti Binibining Pilipinas 2019 iti simmangpet ditoy probinsiya idi May 21 ta umay da agpasyar kadagiti naduma-duma a sikat a pagpasyaran ditoy syudad ti Vigan ken dadduma pay a lugar ditoy probinsiya.
Malaksid iti dayta, agaramid pay dagiti kandidata ti promotional video a makatulong iti turismo ti Ilocos Sur ken maipabuyan to iti mismo a coronation night ti Binibining Pilipinas.
Segun ken ni Provincial Tourism Officer Ryan Astom, agtalinaed dagiti kandidata pakairamanan ti official candidate ti Ilocos Sur iti nasao a beauty pageant a ni Nicole Guerrero agingga inton May 23.
Ti provincial tourism office iti nangisagana iti itinerary dagiti kandidata ket manamnama a pasyaren da dagiti kangrunaan a pagpasyaran ditoy syudad ti Vigan pakairamanan dagiti napipintas a beach ken dadduma pay a lugar ditoy probinsiya.
