Umaboten iti nasurok 8.3 million ti naiwaras a financial assistance ti Department of Migrant Workers wenno DMW kadagiti 165 a distressed Overseas Workers idiay Mandaluyong City.
Ti panangiwaras iti AKSYON Fund Assistance a naisayangkat iti DMW Central Office ket naibasar iti Unified Package for Livelihoods, Industry, Food, and Transport (UPLIFT) initiative ti gobierno.
Segun ken ni DMW National Capital Region Regional Director Atty. Falconi Ace Millar, gagem ti programa a mangipaay iti dagus a suporta kadagiti OFW ken iti pamiliada iti katengngaan ti krisis, emergency, wenno distress situation.
Impaganetget ti ahensia a ti AKSYON Fund ket paset iti panangikagumaan ti gobierno nga ital-o ti kasasaad ken karbengan dagiti baro a bannuar ken dagiti pamiliada.
