Nasarakan iti sangagasut tallopulo a piraso iti unexploded ordnance (UXO) iti maysa a construction site iti Tamag Grounds iti siudad ti Vigan, Ilocos Sur.
Iti pannaki-uman ti Bombo Radyo Vigan ken ni Police Master Sergeant Reynaldo Anor manipod Explosive Ordnance Disposal – Vigan City, nakaawatda iti report manipod Vigan City Police Station inaig ti pannakasarak dagiti construction worker kadagiti daan nga unexploded ordnance isu a dagusda a nagresponde.
Segun ken ni Anor, dagiti nasarakan nga unexploded ordnance ket posible a naaramid wenno karaman kadagiti naidulin a pagpabettak idi World War II ta dati a nagkutaan dagiti tropa iti nasao a paset iti siudad.
Gapu iti kinadaan dagiti dadduma ket saanen a mabigbig pay nu ania a klase iti pagpabettak ngem sangapulo ket maysa a piraso iti nabigbig a mortar idinto a siam a piraso iti anti-tank rifle grenade.
Nupay kasta ket impaganetget dagiti pannakabagi ti linteg iti panagireport latta dagiti umili iti makalida a pagpabettak ta uray kasano kabayag ket posible latta a bumtak.
Kabayatanna, ti higher office wenno idiay Camp Crame iti agbilin nu kaano iti pannaka-dispose dagiti nasao nga unexpoded ordnance.
VIDEO – POLICE MASTER SERGEANT REYNALDO ANOR
