Nasalamaan ti maysa nga L300 a nagkarga iti sangapulo ket dua a baboy nga aggatad ti nasurok-kumurang P180,000 nga awan ti permit-na bayat iti checkpoint idiay Barangay Macabiag, Sinait, Ilocos Sur idi alas dies singkwenta iti rabii, January 7, 2025.
Dagiti naglabsing ket ti nagmaneho iti puraw nga L300 a ni Randy De Leon Gani, agtawen iti uppat a pulo ket maysa, naasawaan agnaed idiay Sitio Masayahin, Barangay Purok San Jose Malino, Mexico, Pampanga idinto a ti helper-na ket ni Jeric Ocampo Supan, agtawen iti tallopulo ket maysa, naasawaan nga agnaed idiay Mexico, Pampanga.
Iti pannaki-uman ti Bombo Radyo Vigan ken ni PLt. Elmer Asistin, adayo pay laeng ti L300 ket naangotdan ti rugit dagiti baboy isu nga idi nakaasideg ket sinalamaanda ket sinaludsodda nu adda iti dokumentoda.
Segun ken ni Asistin, awan iti naiparang a dokumento ti driver ken helper isu a nakikammayetda kadagiti personnel iti Ilocos Sur Animal Provincial Quarantine Office idiay Sinait ket isu iti nakaduktalan a naglabsing dagiti dua iti Provincial Ordinance No. 15-06 Series of 2015.
Ti nasao a lugan ket naggapu idiay Piddig, Ilocos Norte nga agturong idiay Mexico, Pampanga nga isu iti mapapati a pakaipanan dagiti baboy.
Patien dagiti otoridad a saan nga umuna a gundaway dagiti dua a nagibiahe kadagiti taraken a baboy ta posible a tiem-tiempoanda laeng iti kaawan dagiti otoridad nu lumabasda iti probinsia.
Balakadna kadagiti agbibiahe kadagiti taraken a baboy nangruna nu para iti negosyo ket nasaysayaat a dumalan iti husto a proseso ken maaddaan iti naan-anay a dokumento tapno awan ti pagparikotan.
VIDEO – PLT. ELMER ASISTIN
