Pinasingkedan iti ASEAN Tobacco Control Atlas kas maibasar ti panagadal nga inuar ti Southeast Asia Tobacco Control Alliance, a saan laeng nga apektaran dagiti tobacco products ti salun-at no di ket karaman pay iti nakaro nga epektona iti pannakadadael ti aglawlaw.
Maibasar pay iti panagadal, dagiti pagilian ti ASEAN ket mangbusbos iti $10 billion iti tinawen tapno maprotektaran iti marine pollution ken basura gapu ti cigarette butts ken tobacco product packaging.
Malaksid iti Thailand, Singapore, ken Myanmar, nagbalin metten ti Lao a maikapat a pagilian iti Asia a nangibilin iti standardized tobacco packaging.
Inyunay-unay ti organisasion a makapaalarma iti panagado dagiti agtutubo maalallukoy nga agusar kadagiti electronic smoking devices (ESD).
Immunan a kinuna ti Philippine Department of Health a nupay bimmaba ti panagusar iti tabako iti Pilipinas iti napalabas a sangapulo a tawen, immadu ti panagusar iti electric cigarette ken vape, nangruna kadagiti agtutubo nga agtawen iti sangapulo ket tallo agingga sangapulo ket lima.
Nagpalagip dagiti Health professionals a ti panangusar kadagiti electric cigarettes wenno vape products ket saan a natalged nga alternatibo iti panagsigarilio ta mabalin a mangikabil iti pagilian iti peggad manipud iti epidemic ti e-cigarette wenno vape-associated lung injury (EVALI).
