Saan pay a simmungbat ni dati nga Ako-Bicol party-list Rep. Zaldy Co dagiti alegasyon iti mapapati a pannakairamanna iti maanomalya a P289.5 million flood control projects idiay Oriental Mindoro.
Ti ibagbaga ni Assistant Ombudsman Mico Clavano ket ti referral ti Independent Commission for Infrastructure (ICI) idiay Ombudsman nga agkidkiddaw kadagiti kaso a graft, malversation ken falsification kontra ken ni Co ken dadduma pay nga opisyal iti Department of Public Works and Highways gapu iti mapapati a koneksyonda iti road dike project iti abay iti Mag-Asawang Tubig River idiay Naujan, Oriental Mindoro.
Segun ken ni Clavano, bayat nga adda iti sabali a pagilian ni Co ket mabalinna latta nga ipila ti sinapataanna a counter-affidavit-na iti aniaman nga embahada iti Pilipinas.
Saan nga aguray iti Ombudsman iti tignay ni Co iti nabaybayag pay ngem iti rumbeng.
Nu mapaay ni Co nga agipila ti counter-affidavit ket kinuna ni Clavano a solbaren iti Ombudsman ti reklamo kontra kenkuana nga awan ti dependa ti dati nga agpampanday linteg.
Nagikkat ni Co iti puestona nga agpampanday linteg idi Setyembre kasaruno iti adu nga alegasyon a nakairamanna.
