Saan nga aglemlemmeng wenno saan a naglibas ni dati a Congressman Zaldy Co kadagiti pammabasol a maibatbato kenkuana.
Dayta iti pinasingkedan ni Atty. Roy Rondain a tumaktakder nga abogado ti dati a kongresista.
Segun ken ni Atty Rondain, madanagan laeng ti kliyentena kadagiti pangta ti biagna kangrunaan iti social media isu a saan a makasubli iti Pilipinas.
Ni Co ket mairamraman ken maibilang a maysa kadagiti utek iti nakaru a korapsyon iti flood control projects ken arkitekto iti panagpuslit wenno panang-manipulate iti 2025 national budget.
Innayon ni Rondain a ti kangrunaan a pagbutngan ni Co ket ti posible nga aramiden dagiti vigilant group nu kas bilang agpakita iti pagilian.
Maawatanna iti rurod dagiti umili ngem masapul a kitaen ti ebidensya ken ti kasasaad ti biag ti kliyentena sakbay pay a nagbalin nga agpampanday linteg ket balligin a negosyante.
