Kagiddan iti World Malaria Day, nagpanawagan ti World Health Organization a papigsaen dagiti addang manipud iti nainlubongan a patakaran agingga iti panagtignay ti komunidad tapno maparmek ti malaria.
Sipud idi 2000, nasurok-kumurang sangapulo ket tallo a milion a biag ti naisalakan ken dua a bilion a kaso ti malaria ti nalapdan gapu ti panagkaykaysa ti sangalubongan.
Uppat a pulo ket lima a pagilian ken maysa a teritoryo ti maibilang a malaria-free, ngem 600,000 a biag ti napukaw gapu iti malaria idi 2023, kaaduan ket idiay Africa.
Ti mass rollout dagiti bakuna kontra iti malaria ken insecticide-treated nets idiay Africa ket manamnama a mangisalakan kadagiti rinibo nga ubbing iti tinawen.
Karit latta ti kumarkaro a drug resistance, nakapsut a sistema ti salun-at agraman ti climate change, conflict ken kinarigat.
Ti tema ti World Malaria Day ita a tawen ket ‘Malaria Ends With Us: Reinvest, Reimagine, Reignite’ awag para iti natibtibker a kari iti pinansial ken innovation tapno maparmek ti sakit.
