Naurnos ken nakappia iti naisayangkat a White Ribbon March a nakipasetan iti rinibo a miembro manipod iti agduduma a religious, progressive ken civil society groups.
Kalpasan ti nasantoan a misa nga indauluan ni Bishop Jose Colin Bagaforo iti EDSA Shrine, narugian ti martsa iti 1:30 iti malem agturong iti EDSA People Power Monument.
Natalged a nakadanon dagiti nakipaset kalpasan iti nasurok tallopulo a minutos a pannagna bitbitda dagiti placards ken bandera nga adda panawagan a “Panagutin ang lahat ng sangkot” kadagiti isyu ti korapsyon.
Impaganetget ti human rights lawyer a ni Maria Kristina Conti a ti korapsyon ti kangrunaan a rason ti pannakikaysana ken inallukoyna iti gobierno a denggen ti panawagan dagiti umili.
Kinuna met ni Zoe Caballero iti Sentro para sa Tunay na Repormang Agraryo a napateg dagiti nakappia a rally tapno maipakita ti boses ken pigsa dagiti umili.
Pinasingkedan ni PMaj. Hazel Asilo a pannakangiwat ti NCRPO, nasurok duaribo a polis iti naideploy manipod EDSA Shrine agingga People Power Monument tapno masigurado ti kinatalged dagiti nakipaset.
