VIGAN CITY – Manarimaan pay laeng iti imbestigasyon dagiti otoridad iti panagtakawan a napasamak idiay Water Level ken rainfall monitoring idiay Banaoang, Santa a nangtakawan dagiti saan pay nabigbig a suspek kadagiti alikamen nga aggatad ti dua gasut walo pulo ket walo a ribo a pisos.
Pakairamanan kadagiti natakaw nga alikamen ket maysa a voltage controller nga aggatad ti sangapulo ket walo a ribo a pisos; maysa a digital base radio nga aggatad ti sangagasut walo pulo a ribo a pisos; maysa a pc connector nga aggatad ti dua ribo lima gasut a pisos; maysa a GPS antenna nga aggatad ti dua ribo lima gasut a pisos kas pinasingkedan ni Leo Angelo Lutap, agtawen ti dua pulo ket siam, naasawaan, weather observer II ken agnaed idiay Brgy 6, San Julian, Batac City, Ilocos Norte nga isu iti nangipakaammo kadagiti otoridad iti nasao a panagtakawan.
Segun kenni Police Captain Samuel Reyes, hepe ti Santa municipal police station, naudi a namonitor iti water level ti Abra river idi October 1 nga isu iti aldaw a mapapati a natakaw dagiti nasao nga alikamen.
Kinunana, nababa iti alad ken awan silaw na iti nasao a monitoring center isu a nalaka laeng a sinerrek dagiti suspek ket malaksid pay iti dayta, nalaka da laeng a nadadael iti kandado iti lugar.
