Binabalaw ti maysa a political analyst ti wagas a pannakakemmeg ni dati a Presidente Rodrigo Duterte kalpasan nga inruaren ti International Criminal Court ti warrant of arrest kontra kenkuana gapu iti mapapati a ‘crime against humanity’.
Iti pannaki-uman ti Bombo Radyo Vigan ken ni Atty. Michael Henry Yusingco, arigna saan a nasurot ti husto a proseso manipud iti Interpol Manila agingga iti gobierno ta itay laeng parbangon a naawatda ti official copy ti warrant of arrest ti dati a presidente ngem mano laeng nga oras ket kinemmeg isunan ti Philippine National Police.
Inlawlawag ni Yusingco a no naiteden ti Interpol ti kopya ket masapul koma pay nga adalen ti Department of Justice ken PNP.
Bigbigen a parikut ti nasao a political analyst ti saan a panagbalin a transparent ti gobierno iti pannakairuar ti warrant of arrest ni Duterte ken kwestyonable kenkuana no ania ti iggem ti administrasyon tapno maipakemmeg ti dati a presidente.
