Nagkedked ni Vice President Sara Duterte a nagkomento maipapan iti Pax Silica, ti plano nga AI industrial hub iti New Clark City, Tarlac, nga itantandudo ti administrasion ni Presidente Ferdinand Marcos Jr.
Iti video nga inruar ti opisina ti Bise Presidente bayat ti kaaddana idiay The Hague, kinuna ni VP Sara a saanna a mabalin ti agkomento iti nasao a patangan.
Maipalagip nga iti maikalima a State of the Nation Address (SONA) idi Hulio 27, kinuna ni Presidente Marcos Jr. a ti proyekto ket mangpataud kadagiti de kalidad a panggedan, mangpapigsa iti industrial competition ti pagilian, ken mangtignay iti ekonomia.
Ti Pax Silica ket paset ti 23-nation itiative nga idauluan ti Estados Unidos a ti gagemna ket mangipatakde iti AI ecosystem babaen kadagiti data center ken dadduma pay a pasilidad ti technology advancement.
