VIGAN CITY – Nagturpos a kas Summa Cum Laude iti kurso a Bachelor of Arts in Communication iti University of Northern Philippines ti volunteer reporter ti Bombo Radyo a ni Kayla Queddeng, taga-Caoayan, Ilocos Sur.
Iti pannaki-uman ti Bombo Radyo Vigan ken ni Queddeng, nakatulong kenkuana ti Bombo Radyo iti adu a wagas kas ti panangiyestablisarna iti kumpiansana iti bagi, pannakabigbig kenkuana dagiti tao ken ti isasangbay dagiti oportunidad kenkuana babaen iti panangbolboluntaryona kas reporter tunggal adda coverage a mapasamak kas ti eleksion.
Nagbalin nga inspirasyonna ti Namarsua a pagkarkararaganna, ta malaksid iti panagbalinna a volunteer ti Bombo ket maysa pay nga altar server.
Naragsak ita ti riknana ta nagbungan ti amin a sakripisyona kabayatan ti kaaddana iti kolehio agsipud kadagiti kapadasanda a saanda a naturog ken nangan gapu iti panangileppasda kadagiti requirements-da.
Kunana a no ania man ti nagun-odna ita ket sinagananna, ta patienna ti pagsasao nga “If you fail to prepare, prepare to fail”.
