Nasalamaan ti maysa a van a nagkarga iti nasurok-kumurang sangagasut a kilo ti karne ti baboy nga awan ti naan-anay a dokumentona idiay Barangay Tapao, Sinait, Ilocos Sur
Ti nagmaneho ti black Nissan van ket ni Freddie Gabay Aglipay, agtawen iti innem a pulo ket tallo, naasawaan, meat vendor; kaduana ni Ronald Cabea Alcantara, agtawen iti tallopulo ket dua, naasawaan, construction worker nga agpada nga agnaed idiay Barangay 7, Gaang, Currimao, Ilocos Norte.
Impakaammo ti maysa nga empleado ti Ilocos Sur Provincial Animal Quarantine iti Sinait Police Station ti pannakakitada ti lugan a nagkarga iti butchered pork a gappuanan ti panangsalama dagiti pannakabagi ti linteg ket isu ti pannakaduktalda a naglaon iti nasurok-kumurang sangagasut a kilo iti butchered pork nga aggatad ti P30,000.
Segun ti driver, ti butchered pork ket naggapu idiay Barangay Gaang, Currimao, Ilocos Norte ken maipatulod iti ili ti San Juan, Ilocos Sur.
Nupay kasta, napaay ti driver ken kaduana a nangipakita iti dokumento para iti pannakaibiahe iti butchered pork a gappuanan ti panaglabsingda ti Provincial Ordinance 15-06, series of 2015, Section 4b- No Shipping Permit, 4G-without meat Inspector Certificate, 4H-not accredited transport carriers, 4J- iti saanda a pannakaidalan ti inspeksyon, ken 4F – awanan ti meat inspection certificate a naipresentar a nakailanadan ti nagtaudan ti suplay.
Addan iti kustodiya ti Provincial Animal Quarantine ti driver ken kaduana pakairamanan ti naikarga iti lugan a butchered pork tapno dumalan ti proper disposition.
