VIGAN CITY – Dukduktalen pay laeng dagiti kameng ti Bureau of Fire Protection no ania ti posible a nagtaudan ti uram idiay Oaig-Daya, Galimuyod ken no mano ti gatad dagiti nadadael a sanikua.
Segun ken ni Candon City Fire Marshall Fire Senior Inspector Alberto Acapuyan, nakaawatda ti pakaammo nga adda iti maur-uram iti nasao a lugar isu a nagresponde da.
Ti nauram a pagtaengan ket kukua ni Letty Galangco, agtawen ti pito pulo ket pito nga agnaed iti nasao a lugar.
Napaspas a nagkayamkam ti uram ket nairaman iti kaabayna met laeng a pagtaengan ta naaramid laeng iti light material ngem awan iti nadangran.
Maysa kadagiti kitkitaen dagiti otoridad a posible a rason ti uram ket ti nabaybay-an a lutlutwen ni Galangco.
Agsipud iti dayta, inbalakad ni Acapuyan kagiddan iti pananglagip ti Fire Prevention Month iti umay a bulan ti Marso a masapul a mabantayan dagiti malutluto ken siguradwen a saan a nakasaksak dagiti alikamen no panawan iti pagtaengan tapno saan nga ag overheat nga isu pay iti posible a pagtaudan ti uram.
