VIGAN CITY – Ballaigi dagiti uppat a buy-bust operation nga insayangkat dagiti otoridad a nakakemmegan dagiti uppat a suspek ken nakakumpiskaran ti pito a sachet ti maatap a shabu kadagiti nadumaduma a paset iti probinsiya.
Immuna a nakemmeg ni Venancio Pablico, agtawen ti tallo pulo ket lima, bus conductor ken taga Banaoang, Santa, iti buy-bust operation idiay Zone 6, Bantay ket naala kenkuana ti maysa a sachet ti maatap a shabu.
Kabayatanna, lima a sachet a naglaon ti maatap a shabu, pakairamanan ti maysa a buy-bust item, ken tallo ribo uppat a gasut ket lima a pisos a kuarta ti naala kenni Roberto Raganit, agtawen iti tallo pulo ket pito, naasawaan, aglaklako ti siomai a taga Tamorong, Sta. Catalina ken baro a drug personality , iti anti-illegal drug operation iti terminal ti bus idiay Barangay 1, Vigan City.
Nakemmeg pay ni Romeo Jove, agtawen ti uppat a pulo ,naasawaan,cook ken taga Barangay Barangobong, iti buy-bust operation idiay Barangay Pila West, Sta. Lucia ket naala kenkuana ti maysa a sachet ti maatap a shabu ken lima gasut a pisos a buybust money.
Naikursong pay iti pagbaludan ni Jhonson Icari, agtawen ti uppat a pulo , baro, awanan trabaho, maysa a drug surenderer ken taga Nagculooban, Sinait iti buy-bust operation idiay Barangay Rang-ay, Sinait ket naala kenkuana ti maysa a sachet ti maatap a shabu
.
