Maysa iti natay idinto a naipaagas iti ospital dagiti tallo a kakaduana kalpasan iti pannakakuryenteda iti provincial road idiay Barangay Codoog, Narvacan, Ilocos Sur idi rabii, June 2, 2025.
Nabigbig ti natay a ni Roger Baruga Collado, agtawen iti uppat pulo ket innem, naasawaan, laborer nga agnaed idiay Brgy 8, Pagburnayan, Vigan City idinto a dagiti kaduana a nakuryente ket da Raymnundo Martinez Taculog, laborer nga agnaed idiay Cabaroan Laud, Vigan City; Crispin Dave Raguindin, agtawen iti duapulo ket dua, laborer nga agnaed idiay Subec, Sta. Catalina; ken Prodencio Panela Quilendirino, agtawen iti innem a pulo ket dua, naasawaan, laborer nga agnaed idiay Tamorong, Caoayan.
Nagresponde dagiti otoridad idi rabii maipanggep iti mapapati a pannakakuryente iti nasao a lugar ket naammoan a manarimaan iti panangipan dagiti biktima ti solar streetlight pole iti provincial road bayat a natudo iti panawen ket naisagidda ti ungto ti pole iti live wire iti ISECO a gappuanan ti pannakakuryenteda.
Agpapada a naipan iti Ilocos Sur District Hospital-Narvacan dagiti biktia para ti pannakatamingda ngem ni Roger Baruga Collado ket naideklarar a dead on arrival babaen ti attending physician na a ni Dr. Melinda Marcos.
