VIGAN CITY – Maiyur-uray ti resulta ti autopsy ni Jonalyn Ecraela Fabro nga agtawen ti uppat a pulo ket maysa nga agnaed idiay Brgy. Bigbiga, Santiago a nasarakan ti bangkayna iti taltalon idiay Brgy. Suso, Sta. Maria idi February 1 tapno maduktalan no ania iti pudno nga impatay na.
Ti pannaki-uman ti Bombo Radyo Vigan ken ni Police Captain Regin Cabico, hepe ti Sta. Maria municipal police station, agtultuloy iti panagimbestigarda iti nasao a banag ken nakapatangdan iti konduktor ti naglugan ti biktima a bus kasta pay a kitkitaendan dagiti posible a pangalaanda ti CCTV footage a makatulong kadakuada.
Addan dagiti persons of interest da ngem saan da pay laeng a mabalin a maibuksilan iti kinatao da ta manarimaan pay laeng iti imbestigasyon da.
Kabayatanna, inbuksilan ni Marilou Ecraela nga ina ni Jonalyn nga adda ti lalaki a gayyem ti anak na a patiyen da a makatulong iti imbestigasyon ngem agingga tatta ket saan pay laeng a nagpakpakita kadakuada.
Inlawlawag na a saan da a pabpabasolen ti nasao a lalaki a saan da pay laeng nga innaganan ngem kayat da nga agparangen tapnu makatulong iti imbestigasyon ket maipaayan iti hustisya iti ipupusay ti biktima.
Malidayan ni Marilou agsipud ta nakaam-ames iti napasamak ken ni Jonalyn ta malaksid a naburbor ti rupa na ket nakababa pay iti sapin ken underwear na, kasta pay a napukaw amin nga alahas a suot na.
