Natalgeden ti kasasaad ti maysa a pulis a nadunor iti panagdinnungpar ti minanehona a kotse ken ti aluminum van idiay Barangay Gabur Sur, Sta. Cruz, Ilocos Sur.
Nabigbig ti nagmaneho iti Isuzu Aluminum van truck a ni Benjamin Costales Acan, agtawen iti uppat a pulo ket uppat, taga-Sto. Domingo, Urdaneta City, Pangasinan.
Ti met nagmaneho iti Hyundai Accent a kotse ket ni Patrolman James Gabuat Osalvo, agtawen iti duapulo ket pito, taga-Barangay Poblacion Sur, Sta. Maria, Ilocos Sur a naidestino iti La Union Police Provincial Office.
Iti pannaki-uman ti Bombo Radyo Vigan ken ni Police Executive Master Sergeant Beny Cabanas, natalgeden ti kasasaad ti pulis nga agpapaimbag iti ospital kalpasan iti panagsagrapna iti dunor ti nadumaduma a paset ti bagina ken natukkol ti akin-kannigid a sakana.
Maipalgip nga agpapa-abagatan ti trak idinto nga adda iti bangir a linya ti kotse ket idi madanonda ti nakapasamakan ti insidente, naawanan iti kontrol ti kotse ket immagaw iti linya iti trak.
Gapu dayta, nadungpar ti kotse ti akin-kannigid a paset ti trak isu a natulid ti trak iti tengnga ti kalsada idinto a ti kotse ket naipurwak iti daya a paset ti kalsada ken naipit ti drayber iti uneg.
Mapapati a nagtuglep ti drayber ti kotse gapu iti bannugna a naggapu iti trabaho ken agaw-awid isuna idi mapasamak ti aksidente.
Naituding met ti panagpapatang dagiti agsinnumbangir a grupo inton Lunes.
