Pimmusayen ti maysa a pasahero ti kurong-kurong a nakadinnungpar ti mini dump truck iti national highway ti Barangay San Antonio, Narvacan, Ilocos Sur.
Nabigbig ti pimmusay a ni Ashamolie Espiritu, agtawen iti duapulo ket walo, taga-Barangay Quinarayan, Narvacan.
Ti kurong-kurong ket minaneho ni Raymar Galuno de Guzman, agtawen iti duapulo ket lima idinto a dagiti pay dadduma a pasahero ket ti maysa a babai nga agtawen iti sangapulo ket maysa nga isu ti naipasirok iti dump truck ken ni Mylene Lapitan de Guzman, agtawen iti tallopulo ket siam, agpapa a taga-Barangay Quinarayan.
Naduktalan a ti pasahero a pimmusay ket dimmalan iti cesarean operation idi napalabas a lima a bulan ket gapu iti insidente, nagpadara nga isu ti nangpakaro iti sitwasyonna ken puon ti nakatayanna.
Kabayatanna, ti met ubing a naipasirok ket agkasapulan met ita iti dara a Type A.
Kabayatanna, saan met a naan-ano ti nagmaneho iti mini dump truck a ni Dexter Cortel Cabanas, agtawen iti uppat a pulo ket uppat a taga-Banaoang, Santa.
Iti agdama, im-imbestigaran dagiti pannakabagi ti linteg no ania ti pudno a napasamak iti insidente.
