Dead on arrival ti maysa estudiante a binagkong ti kakaseraanna iti uneg ti boarding house idiay Barangay Rosario, Cervantes, Ilocos Sur.
Ti suspek ket agtawen iti tallopulo ket tallo, taga-Barangay Remedios idinto a ti biktima ket agtawen iti duapulo ket uppat, taga-Quirino.
Iti pannaki-uman ti Bombo Radyo Vigan ken ni Police Captain Ivan Clif Anayoyo, Acting Chief of Police ti Cervantes Police Station, agin-inom ti biktima ken dagiti kakaseraanna idin ta dimteng ti suspek a nabartek met laeng.
Mapapati a naririan ti suspek iti biktima ken kadagiti kaduana nga agiinom ket mapapati a nakaisawang iti nasakit a balikas ti suspek isu a kinarit daytoy ti biktima nga agboksingda.
Ngem nangala ti suspek iti patadem ket dinuyokna ti tyan ti biktima.
Naipaagas iti ospital ti biktima ngem saanen a nakalasat.
Naipila metten ti kaso a homicide kontra iti suspek.
