Kritikal ti kasasaad ti drayber ti Honda CRV iti napasamak a karambola dagiti siam a lugan iti national highway ti Barangay San Nicolas, Candon City, Ilocos Sur a nakatayan ti tallo a tattao.
Ti drayber ti Honda CRV ket ni Louie Ganon Garnace, agtawen iti limapulo ket pito, inluganna ni Dandilo Pascua Galigaro, agpada a taga-San Isidro, Candon City.
Kabayatanna, dagiti met natay ket ti maysa a drayber ti Rusi a ni Rodrigo Ugalde Callos, residente ng Barangay Poblacion Norte, Salcedo ken ni Claude Apigo Joshua, agtawen iti duapulo ket siam, taga-Barangay San Nicolas, nagmaneho iti Skygo motorcycle.
Iti pannaki-uman ti Bombo Radyo Vigan ken ni PLT. Jovelyn Antalan, Public Information Officer ti Candon Police Station, ti aksidente ket nakairamramanan ti tallo a four wheels, dua a traysikel ken uppat a motorsiklo.
Maipalagip nga agpapa-abagatan dagiti walo a lugan ta ti maysa a four wheels ket nakaparking iti sangwanan ti Candon City Hospital.
Idi magtengna ti nakapasamakan ti insidente, natukbob ti CRV ti Rusi ken ti Honda Black Airblade a motorsiklo isu a nadungparna ti maysa a traysikel.
Saan a nagsardeng ti CRV ket nagtultuloy ti panagpaabagatanna isu a nadungparna pay dagiti dua a motorsiklo, traysikel, ken dagiti dua a four wheels a Toyota Inova ken Mitsubishi Strada.
Innem ti nadunor ngem dagiti tallo kadakuada ket saanen a nagpaidalan iti medical examination ta nadadaelanda laeng iti lugan idinto a dagiti dua a drayber ti motorsiklo ket dead on arrival.
Natakuatan a ti drayber ti CRV ket nakainom idi napasamak ti aksidente.
