Inaklon ni National Bureau of Investigation Senior Agent John Mark Calilung nga awan ti personal nga ammo na mainaig iti maipagarup nga hitman a maibagbaga nga imbaon ni Vice President Sara Duterte tapno patayen iti First Family.
Pinasingkedan ni Calilung iti salinong ti cross-examination ni defense counsel Atty. Carlo Joaquin Narvasa a naammuan na laeng ti maipagarup a pangta kalpasan a nabuya iti online media briefing ni VP Sara idi Nobiembre 23, 2024.
Inlawlawag na a ti responsibilidad na ket imbestigaran laeng ti video ken awan ti personal na nga impormasion mainaig iti maipagarup nga hitman.
Idi agsaludsod ni Senator-judge Bam Aquino no adda pay a maipasango a testigo mainaig ti maipagarup nga hitman, pinasingkedan ni private prosecutor Amando Virgil Ligutan nga adda pay maipasango da a sabali.
