VIGAN CITY – Rugianen ni Agustina Bantiloc, umuna a Filipino Para-archer a nakastrek iti 2024 Paris Olympics ti nain-inget a panagsanayna ita a bulan kas panagsagsagana iti Paris Paralympic Games a maangay inton Agosto 28 agingga Setymente 8.
Iti pannaki-uman ti Bombo Radyo Vigan ken ni Bantiloc, agtultuloy met ti panagsanayna ngem ita a bulan, padasennanton ti distansya iti archery a kasapulan iti nasao nga event.
Maragsakan a nakastrek iti Olympiada ta nabayagen nga arapaapna ken pagyamananna ti Namarsua ket inkarina nga aramidenna ti amin a kabaelanna tapno lumaban iti patas.
Innayonna a sisusuporta ti Philippine Sports Commission ken Philippine Olympic Committee iti pannakaipaay kadakuada nga atleta dagiti equipment, allowance ken uniporme.
Ni Bantiloc ket na-qualify babaen iti Bipartite Commission Invitation ken gapu ta nasurotna ti minimum qualification standards.
Paset ti nasao nga para-athlete iti duo a nakagun-od iti bronze medal iti Compound Open Mixed Category ti Para Archer Olympic Qualifiers idiay Thailand idi napan a tawen.
