VIGAN CITY- Patien ni Atty. Harry Roque a mapagbalin a linteg ti Universal Health Care bill sakbay a malpas ti sesyon ti Kongreso inton Disyembre uray no ado dagiti saludsod ken pagkurangan a nakita dagiti agpanpanday linteg isu a saan pay a napparubaran iti bicameral conference committee a ti gagem na ket maikkan ti mandatory health services dagiti umili nangruna kadagiti napapanglaw.
Ti pannakiuman ti Bombo Radyo Vigan kenni Roque, kinunana a pito pulo ket uppat a pages ti nasao a gakat isu a manamnama nga atiddog ti agbalin a proseso na ngem dakkel ti pammati na a no adda man dagiti saan a mapagkikinnaawatan a probisyon ket masimpan to met laeng.
Inaklon ni Roque a saan pay laeng a kabaelan ti gakat a sakupen dagiti specialized a serbisyo isu nga iti initial implementation na ket dagiti importante ken primary health benefit ken serbisyo.
Karaman pay kadagiti nakailanad ti gakat ket ti pannakapatakder ti opisina ti health promotion a maisina iti Department of Health a ti gagem na ket mangbukel ken mangipatungpal kadagiti programa tapno mapagtalinaed ti nasalun-at a bagi dagiti umili .
Maipalagip a karaman kadagiti kwinestyunaran ni Senate Pro Tempore Ralph Recto ket ti equal benefit kadagiti napapanglaw nga umili ken dagiti contributors ti Philhealth iti univerisal health care bill .
Insingasing ni Recto a maikkan ti insentibo dagiti contributors ti Philhealth a saan a maited kadagiti benepisyaryo ti universal health care bill ta pagamkan na nga agpeggad ti pondo ti Philhealth ta posible a saanton nga agbayad dagiti contributors.
