Maysa nga agtawen iti innem iti natay idinto nga agpapaagas iti ospital ti kaduana nga agtawen iti walo gapu iti pannakalmesda iti Amburayan River, Barangay Danac, Sugpon, Ilocos Sur idi kalman, April 13, 2025 .
Segun kadagiti pannakabagi ti linteg, ti biktima nga agtawen iti innem ket agnaed idiay Buguias, Benguet idinto a ti agtawen iti walo ket taga-Sudipen, La Union.
Naakaawat dagiti kameng ti Sugpon Municipal Police Station iti pakaammo maipanggep iti pannakalmes ti biktima kaduana ti maysa met laeng nga ubing nga agpada a naipan iti Sugpon Rural Health Unit.
Segun ti ina ti biktima, naglangoy dagiti dua nga ubbing iti kaadayo a sangagasut a metro manipod iti ayanna ket kalpasan laeng ti sumagmamano a minutos, isun ti pannakakitana ti anakna a tumtumpaw iti karayan.
Insigidana a tinurong tapno koma isalakan ngem nalmesen ti biktima iti dayta a gundaway idinto a ti maysa nga ubing ket insalakan ti amana.
Numan pay insayangkat dagiti kameng ti Municipal Disaster Risk Reduction and Management Council iti CPR iti biktima ken impanda iti RHU Sugpon ket saanen a nakalasat pay idinto a ti agtawen iti walo nga ubing a naisayangkatan iti first aid ket naipan iti Ilocos Sur District Hospital Bio, Tagudin.
