Nadunor iti ulo ken nadumaduma a paset ti bagi ti maysa nga ubing a lalaki gapu iti aksidente a pannakadungparna iti Barangay Road idiay Bacsil, San Juan idi kalman, April 13, 2025.
Ti nagmaneho iti Euro motorcycle ket ni Franklyn Isaac Uruyansa, agtawen iti uppat a pulo ket uppat, security guard nga agnaed idiay Barangay Bacar, Magsingal idinto a ti pedestrian ket agtawen iti tallo nga agnaed idiay Barangay Bacsil, San Juan.
Iti imbestigasyon dagiti otoridad, agpapadaya a direksyon ti motorsiklo ket idi nadanonna iti nasao a lugar, kellaat a bimmallasiw ti ubing iti kalsada a naggapu iti bagatan nga agturong iti amianan isu nga aksidente a nadungpar ti motorsiklo.
Gapu ti sinagaba ti ubing ket naipaagas iti Ilocos Sur District Hospital, Magsingal idinto a saan a naan-ano ti driver iti motorsiklo.
