Naragsak a makakitkita ti Rank 1 iti Criminologist Licensure Exam a proud kenkuana dagiti nagannak ken ti pagadalan a naggapuanna iti panagbalinna a topnotcher.
Iti pannaki-uman ti Bombo Radyo Vigan ken ni Alyssa Eliana Bautista, graduate iti Araullo University, saan pay laeng a nakapap-papati kenkuana iti panagbalinna a topnotcher gapu kadagiti rigat a naglabasanna ta naggurgurigor pay idi nagexam ngem saanna a pinaunot a masakit no di ket pinanunotna ti gagemna a makapasa ken mai-top na ti board exam.
Ibilbilangna nga inspirasyon ti pamilia, dagiti tao a kanayon a mangsupsuporta kenkuana ken ti pagadalan a naggapuanna.
Iti agdama, planona a sumrek iti academe ta kayatna ti agsubad iti pagadalan a naggapuanna ken makatulong kadagiti future criminologist.
Kabayatanna, time management met ti nagbalin a tulbek ti Rank 2 iti panangipasana ti exam.
Iti pannaki-uman ti Bombo Radyo Vigan ken ni Jericho Suarez, graduate iti Univesity of Mindanao – Davao City, saan nga isuna ti klase ti tao nga agpatnag nga agrev-review no di ket nagbalin laeng a consistent iti inna panagbasa iti inaldaw.
Idi panawen ti panag-reviewna, duapulo a panid iti reviewerna ti leppasenna iti inaldaw a buyoganna iti konsentrasyon.
Segun ken ni Suarez, saanna a pinampanunot ti agtopnotcher no di ket tay laeng maaramidna ti amin a kabaelanna isu a pagyamananna daytoy a naisubad kenkuana.
