VIGAN CITY – Kaso a panaglabsing ti Republic Act 9165 wenno Comprehensive Dangerous Drugs Act of 2002 ken panaglabsing ti Republic Act 10591 wenno illegal possession of firearms and ammunition act iti nakakemmegan ti maibilang a top most wanted person idiay Barangay Pug-os, Sinait babaen iti bileg ti tallo a warrant of arrest nga inparuwar ti korte kontra kenkuana.
Nabigbig ti suspek a ni Juanito Ibatuan nga agtawen ti uppat a pulo ket walo, drug surrenderee ken maysa a gwardiya nga agnaed iti nasao a lugar.
Nadakamat ni Police Captain Bryan Tacazon, hepe ti Sinait municipal police station, a ti suspek ket maibilang a high value target ti Philippine Drug Enforcement Agency ken Regional Drug Enforcement Unit agsipud ta isu ti maysa kadagiti kapigsaan ken kadakkelan a drug pusher iti nasao a lugar sakbay a na-raid iti pagtaengan na idi bulan ti Agosto ngem saan a nakemmeg agsipud ta nakalibas idi.
Idi namonitor dagiti otoridad a nagsublin idiay lugar da ti suspek, isu iti nabayag a sinip-siputan da agingga nga inbanag da kenkuana ti tallo a warrant of arrest na nga inparuwar ni Hon. Homer Ragonjan, presiding judge ti Regional Trial Court, Branch 24, Cabugao a poon iti nakakemmegan na idi alas singko kinse ti malem idi November 27.
Tallo gasut ket innem a pulo ribo a pisos iti naiyetnag a piyansa ti suspek para iti temporaryo a pannakawaya-waya na.
