VIGAN CITY – Nakemmeg ti maysa a Top 1 Most Wanted Personality iti naiwayat a buy bust operation idiay Brgy. Labut Norte, Santa ken sumango iti kaso a panaglabsing iti Comprehensive Dangerous Drugs Act of 2002.
Nabigbig ti suspek a ni Amante Advincula, agtawen iti limapulo ket dua nga agnaed iti nasao a lugar ken karaman iti drugs watchlist ti Santa Municipal Police Station.
Iti pannaki-uman ti Bombo Radyo Vigan ken ni P/Lt. Sygman Benigno iti Santa Municipal Police Station, datin a drug surrenderer ti suspek ken iti mismo pagtaenganda ti pangdandanunan dagiti laklakwanna iti iligal a droga ta ti suspek ket na- mild stroke iti kallabes.
Naala kenkuana ti maysa a bassit a transparent sachet ti mapapati a shabu, sangapulo ket siam a bassit a transparent sachet nga ikotna ken dua a lima gasut a pisos a marked money nga agdagsen amin iti 0.9 a gramo nga aggatad iti duapulo a ribo a pisos.
Addan iti kustodia dagiti pannakabagi ti linteg ti suspek ken dagiti naala kenkuana a kontrabando tapno maidalan iti husto a proseso.
