Pinasingkedan ni ACT Teachers Partylist Rep. Antonio Tinio a mailabsing iti pagannurotan ti House of Representatives ti saan a natuloy a pannakaipila ti simmaruno nga impeachment complaint kontra ken ni Presidente Ferdinand Marcos Jr.
Dayta ket kasaruno ti saan a panangawat ti opisina ti Secretary General gapu iti kaawan ti mismo nga opisial idi maipasa ti impeachment.
Iti pannaki-uman ti Bombo Radyo Vigan ken ni Tinio, no ibasar iti pagannurotan ti kamara, ti maysa nga impeachment complaint ket maipasa iti Office of the Secretary General isu a mabalin nga awaten daytoy ti asino man nga adda iti nasao nga opisina, ket saan a nadakamat a direkta a maipasa iti Secretary General.
Kinuna ni Tinio a nalawag a saan a kayat nga awaten ti Executive Director nga adda idiay ti nasao nga impeachment complaint, banag a mailabsing iti pagannurotan.
Mamati ti kongresista nga adda intensyon ti nasao nga addang a lapdan ti constitutional process iti panangdusa iti presidente gapu iti saan a natuloy a panangawat iti reklamo.
